Today Myanmar
ရာသီဥတုကတော့ တစ်နေ့ထက် တစ်နေ့
ပူပြင်းလာပါပြီ။ ရန်ကုန် နဲ့ မြန်မာပြည်အောက်ပိုင်း ဒေသတွေ ကတော့ တစ်ခါတစ်ရံ
မိုးလေးဘာလေး အုံ့တော့ နည်းနည်း ခံသာသေးတယ်။
အညာဒေသတွေ ကတော့ မိုးရိပ်လေရိပ်လည်း
မမြင် ၊ ရာသီဥတုကလည်း စင်တီဂရိတ် (၄၃-၄၅)လောက် နီးပါးလောက်ကို တက်နေတော့
“သက်ကြီးရွယ်အိုတွေ ၊ ကျန်းမာရေးမကောင်းသူတွေ” တဖြုတ်ဖြုတ်နဲ့ ကွယ်လွန်နေကြကြောင်း
သတင်းကြားရတာ စိတ်မကောင်းစရာဘဲဗျာ။
ရန်ကုန်မှာလည်း ကိုယ့်အိမ်မှာဘဲ နေရင်တော့
သိပ်မသိသာဘူးပေါ့ဗျာ။ အပြင်ကို ကိစ္စရှိလို့ ထွက်မိလိုက် ရင် တက္ကစီ စီးရတာကိုက
“ငရဲခံနေရသလား” မှတ်ရတယ်။ မီးပွိုင့်စောင့်နေရလို့ဖြစ်ဖြစ် ၊ Traffic Jam
ဖြစ်နေလို့ဖြစ်ဖြစ် နေပူထဲကြာကြာရပ်နေရလေလေ ၊ အပူဒဏ်ကို သေမတတ်ခံရလေလေဘဲ။
ကိုယ်တောင် ဒီလောက် အပူဒဏ် ခံနေရတာဆိုရင်
တစ်နေကုန် ကားမောင်းနေရတဲ့ တက္ကစီသမားတွေရဲ့ ဘ၀ကို စာနာမိတယ်။ အခုနောက်ပိုင်း
ဝင်လာတဲ့ ကားတွေမှာ “အဲယားကွန်း” တွေ ပါပါတယ်။ ဒါပေမယ့် တက္ကစီသမားတွေခဗျာ
မဖွင့်နိုင်ဘူး ခင်ဗျ။ တက္ကစီတွေက တစ်နေ့ထက် တစ်နေ့ ပေါလာတော့ အခေါက်ရေက
နည်းလာတဲ့အထဲ အဲယားကွန်းဖွင့်လိုက်ရင် ဆီပိုစားပြီး နေ့တွက် မကိုက်မှာမို့
ဒီအတိုင်း အပူဒဏ်ကို ကြိတ်မှိတ်ခံပြီး ကားဆွဲနေကြရတဲ့ သူတို့ဘ၀ကို ကြည့်ပြီး
စိတ်မကောင်းဘူး။
ဒါကြောင့် အခုရက်ပိုင်း တက္ကစီငှားရင်
ကားခကို သူတို့တောင်းတဲ့အတိုင်း ပေးလိုက်တာပါဘဲ။ တန်၏ မတန်၏ ကြည့်မနေတော့ပါဘူး။
သူတို့လည်း ပိုတောင်းရင် (၁၅၀၀) ခရီးကို (၂၀၀၀) လောက်ပါဘဲ။ ဒါလည်း အလှူတစ်ခုဘဲလေ။
ကဲ – တက္ကစီသမားတွေ အကြောင်း
ပြောရင်းနဲ့ အခုလို ပူပြင်းလှတဲ့ နွေရာသီမျိုးမှာ “အပူဒဏ်မခံနိုင် သူများ”အတွက်
နည်းကောင်းလေးတစ်ခု ပေးချင်ပါတယ်။
ဒီနည်းလေးကတော့
ကွယ်လွန်သွားရှာပြီဖြစ်တဲ့ “ဆရာသာဂဒိုး” ရဲ့ နည်းလေးပါ။ ကျန်းမာတဲ့ လူတွေ
အတွက်တော့ သိပ်မသိသာပေမယ့် မကျန်းမာသူ ၊ အသက်ကြီးသူများအတွက်တော့ အလွန်သိသာပါတယ်။
ဆေးနည်းလေးက -
ကျွန်တော်တို့ နေ့စဉ်သောက်နေတဲ့
“ရေနွေးကြမ်း” ပါဘဲ။ မနက်စောစောကတည်းက ရေနွေးကြမ်းကို ကျကျလေးနှပ် ၊ ပြီးရင်
လုံးဝ, အေးသွားတဲ့ အထိ အအေးခံထား။ နေ့လည်လောက်ဆို သောက်လို့ရပြီ။ နေ့လည်
အပူချိန်တက်နေတဲ့ အချိန်မှာ ရိုးရိုးရေမသောက်ဘဲ အဲဒီ ရေနွေးကြမ်း အအေးကိုသာသောက်နေ။
တကယ် အပူဒဏ် ခံနိုင်တယ်။
နေပူထဲမှာ ကားမောင်းနေရတဲ့
ဒရိုင်ဘာတွေလည်း မနက်ကတည်းက ဒီလို ရေနွေးကြမ်း အအေးကို ရေသန့်ဗူးလေးနဲ့ (၂)ဗူး
(၃)ဗူးလောက် ထည့်ထား။ ရိုးရိုးရေအစား အဲဒါဘဲသောက်ကြည့်။ ခါတိုင်းနေ့တွေ လောက်
အပူဒဏ်ကို မခံရတာ သတိထားမိပါလိမ့်မယ်။
တစ်ခုသတိထားရမှာတော့
လဘ္ဘက်ခြောက်ကိုတော့ သိပ်အပေါစား အညံ့စားကြီး မသုံးနဲ့ပေါ့ဗျာ။ တော်ကြာ
ဆိုးဆေးတွေထပ်ဆိုးပြီး အကြံအဖန်လုပ်ထားတဲ့ လဘ္ဘက်ခြောက် အတုတွေနဲ့ တွေ့သွားပြီး
“ဆေးမဖြစ်ဘဲ၊ ဘေးလည်းဖြစ်သွားဦးမယ်”။
ဒီရာသီမှာ လုံးလုံးရှောင်သင့်တာကတော့
“ရေခဲရေ” ပါဘဲ။ သောက်လိုက်တဲ့ ခဏတော့ အေးသွားသလို ရှိပေမယ့် နောက်ပိုင်း
ရင်တွေပူလာ၊ ရေပို ငတ်လာ ၊ အဆင်မသင့်ရင် ဆီးဝမ်းပါ ချုပ်ပြီး ၊ ဆီးပူဆီးအောင့်ပါ
ဖြစ်လာမယ်။ လည်ချောင်းတွေ နာလာမယ်။ အာသီးတွေ ရောင်လာမယ်။ ချောင်းတွေ ဆိုးလာမယ်။
မျက်စေ့တွေ ဝေလာမယ်။
အသက်ငယ်သူတွေ ၊ ကျန်းမာရေး
ကောင်းသူတွေတော့ မပြောတတ်ဘူး။ အသက်ကြီးသူတွေနဲ့ ကျန်းမာ ရေး မကောင်းသူတွေအတွက်တော့
ဒီလောက်ပူပြင်းတဲ့ ရာသီမှာ “ရေခဲရေ” ဟာ သိပ်အန္တရာယ် ကြီးပါ တယ်။
နောက်ထပ် အပူငြိမ်းစေတဲ့
အစားအစာတစ်ခုလည်း တင်ပြချင်ပါသေးတယ်။ အဲဒါကတော့ မြန်မာ့ရိုးရာ စားစရာ“ထန်းလျှက်”
ပါ။ “ထန်းလျှက်” ဟာ အခုလို ပူပြင်းတဲ့ ရာသီမှာ တကယ်စားသင့်တဲ့ အစာတစ်ခုပါ။
ထန်းလျှက်ဟာ ကိုယ်ခန္ဓာရဲ့ သက်စောင့်ဓာတ်ဖြစ်တဲ့ “၀မ်းမီး” ကို အလွန်မှန်စေပါတယ်။
ချိုတာခြင်း တူပေမယ့် “သကြား” “ကြံသကာ” တွေနဲ့ မတူပါဘူး။
ကျွန်တော်တို့ အဖိုးအဖွားတွေ
ရှိတုန်းကတော့ နေပူထဲက ပြန်လာရင် ရေမသောက်ခင် ထန်းလျှက် တစ်လုံးနှစ်လုံးကို
အရင်စားခိုင်းပြီးမှ ရေသောက်ခိုင်းလေ့ ရှိပါတယ်။ ထန်းလျှက်ဟာ ကိုယ်တွင်း အပူမီးကို
ငြိမ်းစေတာကြောင့် အပူနဲ့ အအေးတွေ့ပြီး ဒုက္ခရောက်တာမျိုး မဖြစ်စေဘူးလို့ ဆိုပါတယ်။
အပူလျှပ်ပြီး ဖျားတာမျိုး မဖြစ်စေဘူးလို့ ဆိုပါတယ်။ ဒါပေမယ့် ဒီခေတ်မှာကလည်း
ထန်းလျှက်ဆိုတာ ကလေးတွေ မစားကြတော့ဘူးခင်ဗျ။ (ကျွန်တော့် သားသမီးတွေဆို
ချော့ကျွေးကျွေး/ ခြောက်ကျွေးကျွေး , ကျွေးလို့ မရပါဘူး။ သားသမီးကို မိဘ
မနိုင်တဲ့ခေတ်)
“ထန်းလျှက်”မှာလည်း အရောင်ဖြူနေတဲ့
ထန်းလျှက်တွေဟာ အာနိသင် သိပ်မရှိဘူး။ အနီရောင် ရင့်ရင့်ရှိတဲ့ ထန်းလျှက်မျိုးမှ
အာနိသင် ရှိပါတယ်။ ရန်ကုန်မှာတာ့ ဒီလို ထန်းလျှက်မျိုး ရှာလို့ခက်ပါတယ်။
သိမ်ကြီးဈေး တစ်ဝိုက်မှာတော့ ရှိတတ်ပါတယ်။
ဒါကတော့ အပူဒဏ်ကို မခံနိုင်သူများ နဲ့
အပူဒဏ်ကို ကာကွယ်လိုသူများ အတွက် ပို့စ်လေးတစ်ခုပါ။ အပူမကြောက်လည်း မကြောက် ၊
ရေခဲရေလည်း အလွန်ကြိုက်သူများအတွက်တော့ အကျိုးရှိမည် မဟုတ် ပါ။
ကျန်းမာချမ်းသာကြပါစေ။
.
ဒေါက်တာတင်ဗိုလ်ဗိုလ်
(ကွန်ပျူဗေဒသုခုမ)
.
မှတ်ချက်
———-
အပူဒဏ်ကြောင့် ချွေးများအရမ်းထွက်ပြီး
မောပန်းနွမ်းနယ်မှု များလွန်းနေလျှင် “ဓာတ်ဆား” ရည် သောက် ရန် လိုပါလိမ့်မည်။
ဓာတ်ဆားရည်သည် “၀မ်းသွားမှ သောက်ရန်မဟုတ်ပါ” ။ အပူဒဏ်ကြောင့် ပင်ပန်း
နွမ်းနယ်လွန်းလျှင်လည်း သောက်သင့်ပါသည်။ သွေးတိုးရှိသူများအတွက်တော့ ဆရာဝန်နှင့်
တိုင်ပင်ပြီးမှ သောက်ပါ။ ထန်းလျှက်ကလည်း ဆီးချိုရှိသူများ သင့်တော်မည် မဟုတ်ပါ။
“ရေနွေးကြမ်းအေး” ကတော့ မတည့်သည့်ရောဂါ မရှိသောကြောင့် အကောင်းဆုံး ဖြစ်မည်
ထင်ပါသည်။
Good health
No comments:
Post a Comment